Канон кресту животворящему

Тропарь Креста, глас 1:

Спаси́, Го́споди, лю́ди Твоя́, / и благослови́ достоя́ние Твое́, / побе́ды на сопроти́вныя да́руя, / и Твое́ сохраня́я Кресто́м Твои́м жи́тельство.

Кано́н честно́му и животворя́щему Кресту́, и святы́м му́чеником. Творе́ние Ио́сифово, Гла́с 4.

Пе́снь 1

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зныма Моисе́овыма рука́ма, Амали́кову си́лу в пусты́ни победи́л е́сть.

Припев: Слава, Господи, Кресту Твоему Честному.

Пропны́й не́бо, распросте́рл еси́, Иису́се, дла́ни Своя́, язы́ки дале́че су́щыя от Тебе́, я́ко бла́г и милосе́рд, све́тло к Себе́ призыва́я.(Дважды)

Слава: Кресто́м Твои́м, Христе́ мо́й Сло́ве, огради́ мя, я́ко да не бу́ду уловле́ние во́лку, моея́ и́щущу поги́бели, и по вся́ дни́ се́ти мне́, и ловле́ния гото́вящу.

И ныне, Богородичен: Де́ва по Рождестве́ пребыла́ еси́, Бо́га бо родила́ еси́, Пречи́стая, воздви́жена на Кресте́ и земны́я совоздви́гшаго. Те́мже Тя́ вси́ ве́рнии велегла́сно ублажа́ем.

Пе́снь 3

Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище и утвержде́ние.

Воздвиза́ем на Кре́ст, низве́рженыя во тлю́ возне́сл еси́, Христе́ Бо́же на́ш, и врага́ све́ргл еси́, Влады́ко.(Дважды)

Слава: Мечи́ вра́жия притупи́шася, Тебе́ прободе́ну в ре́бра, Сло́во О́тчее ипоста́сное, и Еде́м отве́рзеся.

И ныне, Богородичен: Непоро́чная А́гница, ви́дящи Тя́, Влады́ко, воздви́жена на Кресте́, плаче́вно рыда́ющи, поя́ше держа́ву Твою́.

Седален, глас 8.

Прообража́ше та́йне дре́вле Иису́с Нави́н Креста́ о́браз, / егда́ ру́це простре́ крестови́дне, Спа́се мой, / и ста со́лнце, до́ндеже враги́ низложи́, противостоя́щия Ти, Бо́гу; / ны́не же за́йде, на Кресте́ Тя зря, / и, держа́ву сме́ртную разруши́в, / весь мир совоздви́гл еси́.

Пе́снь 4

Ирмо́с: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Воздви́жена Тя́ на Дре́во хоте́нием со́лнца сла́вы, смотря́я со́лнце тьмо́ю облече́ся, и ка́мение распада́шеся, и церко́вная заве́са раздра́ся.(Дважды)

Слава: Распина́ему Тебе́, Спа́се, и копие́м пробода́ему, обраща́ющееся ору́жие дая́ше плещы́, повеле́нием Твои́м, Го́споди, разбо́йнику благонра́вному, песносло́вящу держа́ву Твою́.

И ныне, Богородичен: Я́же безле́тнаго в ле́то поро́ждши, и де́вство непоро́чно Еди́на стяжа́вши, на Дре́во воздви́жена я́ко ви́девши Го́спода, боле́зньми ду́шу Свою́ разделя́ше.

Пе́снь 5

Ирмо́с: Ты́, Го́споди мо́й, Све́т в ми́р прише́л еси́, Све́т святы́й, обраща́яй из мра́чна неве́дения, ве́рою воспева́ющыя Тя́.

Прободе́ным Твои́м ре́бром, нетле́ния источа́еши мне́ струи́ Боже́ственныя, о Влады́ко, ребра́ преступле́нием, в тле́ние попо́лзшемуся.(Дважды)

Слава: Честны́й Кре́ст Тво́й, на враги́ е́сть побе́да: его́же да́л еси́ на́м, Сло́ве, душа́м во спасе́ние, ве́рою воспева́ющым Тя́.

И ныне, Богородичен: И́же еди́н благи́й, вше́дый во чре́во Твое́ нетле́нное, Пречи́стая, воплоща́ем яви́ся и ра́спят: я́ко да от истле́ния на́с изба́вит.

Пе́снь 6

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею Кро́вию.

Вся́кия вы́ше че́сти пребо́льший сы́й, обезче́ститися претерпе́л еси́, я́ко да мя́ зле́ обезче́стившагося почти́ши, и Кресто́м спасе́ши, Человеколю́бче.(Дважды)

Слава: На дре́во возноси́м и ме́ртв у́бо бы́л еси́, Го́споди, умертви́теля же сотвори́в ме́ртва души́ моея́, и вся́каго испо́лнена студа́: и ны́не, Тво́рче мо́й, пою́ Твою́ си́лу.

И ныне, Богородичен: Гвоздьми́ Тя законопресту́пных собо́р пригвозди́ на Кресте́, и печа́ли ны́не ору́жием Мое́ се́рдце растерза́ю, о Сы́не Мо́й! Де́ва вопия́ше слезя́щи.

Кондак, глас 4:

Вознесы́йся на Крест во́лею, / тезоимени́тому Твоему́ но́вому жи́тельству / щедро́ты Твоя́ да́руй, Христе́ Бо́же, / возвесели́ нас си́лою Твое́ю, / побе́ды дая́ нам на сопоста́ты, / посо́бие иму́щим Твое́ oру́жие ми́ра, / непобеди́мую побе́ду.

Икос:

И́же до тре́тияго Небесе́ восхище́н бысть в рай / и глаго́лы слы́шав неизрече́нныя и Боже́ственныя, / и́хже не леть язы́ки глаго́лати, / что Гала́том пи́шет, я́ко рачи́телие Писа́ний прочто́сте и позна́сте: / мне, глаго́лет, хвали́тися да не бу́дет, то́кмо во еди́ном Кресте́ Госпо́дни, / на не́мже, страда́в, уби́ стра́сти. / Того́ у́бо и мы изве́стно держи́м, Крест Госпо́день, хвалу́ вси: / есть бо нам спаси́тельное сие́ Дре́во / oру́жие ми́ра, непобеди́мая побе́да.

Пе́снь 7

Ирмо́с: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем опаля́еми, взыва́ху: благослове́н еси́ в хра́ме сла́вы Твоея́, Го́споди.

Распя́тся хотя́й на дре́ве на́г, Еди́не Безсме́ртный, облача́яй не́бо о́блаки, и и́же дре́вле пра́отца обнажи́вшаго, обле́кл еси́ ве́чный.(Дважды)

Слава: На Кре́ст возне́слся еси́, и пады́й Ада́м возста́л е́сть: копие́м прободе́н бы́л еси́ в ре́бра Влады́ко, и я́зву сме́ртную прия́т многоко́зненный, благослове́на держа́ва Твоя́, Го́споди.

И ныне, Богородичен: В пещи́ ро́су я́вльшаго Христа́ Бо́га, Отрокови́це, ника́коже опа́льша чре́во Твое́, ви́дящи пове́шена на Дре́ве, сла́вляше е́же па́че ума́ Твоего́ соше́ствие.

Пе́снь 8

Ирмо́с: Ру́це распросте́р Дании́л, льво́в зия́ния в ро́ве затче́: о́гненную же си́лу угаси́ша, доброде́телию препоя́сашеся, благоче́стия рачи́тели о́троцы, взыва́ше: благослови́те вся́ дела́ Госпо́дня Го́спода.

Просте́р дла́ни на Кресте́ Влады́ко, руки́ неудержа́нныя хотя́ исцели́ти прегреше́ния: гвоздьми́ же пригвозди́лся еси́, Го́споди, ве́сь ра́зум первозда́ннаго оте́мля стра́стный, пою́ща: благослови́те вся́ дела́ Госпо́дня Го́спода.(Дважды)

Слава: Раздира́ется рукописа́ние первозда́ннаго Ада́ма, прободе́нием Боже́ственных ре́бр Твои́х: ка́плями же кро́ве, Влады́ко, освяща́ется вся́ земля́, во гла́сех благодаре́ния при́сно зову́щи: благослови́те вся́ дела́ Госпо́дня Го́спода.

И ныне, Богородичен: Умерщвля́ема зря́щи Христа́, многопе́тая Влады́чица, и умертви́вшаго челове́ки умерщвля́юща врага́, я́ко Влады́ку поя́ше пла́чущи, и долготерпе́нию Его́ дивя́щися вопия́ше: благослови́те вся́ дела́ Госпо́дня Го́спода.

Пе́снь 9

Ирмо́с: Ка́мень нерукосе́чный от несеко́мыя горы́ Тебе́, Де́во, краеуго́льный отсече́ся, Христо́с, совокупи́вый разстоя́щаяся естества́. Те́м веселя́щеся Тя́, Богоро́дице, велича́ем.

Се́ жи́знь пове́шена на Кресте́ все́м яви́ся: со́лнце же того́ не терпя́щи лучы́ оставля́ет, и земля́ коле́блется, и помышле́ния утвержда́ются на благоче́стии и чистоте́.(Дважды)

Слава: О ка́ко Тя́, Законода́вца, беззако́нный собо́р осужда́ет, Иису́се мо́й, на Дре́ве умре́ти, Живота́ все́х су́ща и Го́спода, и ра́ди страсте́й все́м челове́ком источа́юща безсме́ртие?

И ныне, Богородичен: Просвети́, Чи́стая, ду́шу мою́ от грехо́в омраче́ную, и отжени́ зо́л мои́х о́блаки, све́та о́блаче, я́же помрачи́вшееся со́лнце дре́вле ви́девши внегда́ распя́тися Безсме́ртному.

Молитва Честному и Животворящему Кресту

О, ди́вный чудоде́йственною си́лою четвероконе́чный и трисоста́вный Кре́ст Христо́в! У подно́жия твоего́ во пра́х распросте́ртый, поклоня́юся ти́, честно́е Дре́во, отгоня́ющее от на́с вся́кое де́монское стреля́ние и освобожда́ющее на́с от все́х бе́д, скорбе́й и напа́стей. Ты́ бо еси́ Дре́во жи́зни, ты́ еси́ очище́ние возду́ха, освяще́ние свята́го хра́ма, огражде́ние на́шего жили́ща, охране́ние одра́ моего́, просвеще́ние ума́ моего́, се́рдца и все́х мои́х чу́вств. Твое́ свято́е зна́мение огражда́ет мя́ со дня́ моего́ креще́ния, оно́ со мно́ю и на мне́, во вся́ дни́ живота́ моего́, на су́ше и на вода́х, оно́ же сопровожда́ть мя́ бу́дет до моги́лы, осени́т и пра́х мо́й, оно́ бо, свято́е зна́мение чудоде́йственнаго Креста́ Госпо́дня, возвести́т все́й вселе́нной о часе́ всео́бщаго воскресе́ния ме́ртвых и после́дняго стра́шнаго и пра́веднаго Суда́ Бо́жия.

О, Кре́сте Всечестны́й! Осене́нием твои́м вразуми́, научи́ и благослови́ мя, недосто́йнаго, всегда́ несомне́нно ве́рующаго в непобеди́мую си́лу твою́, огради́ мя от вся́каго врага́ и супоста́та, исцели́ вся́ неду́ги моя́ душе́вныя и теле́сныя.

Го́споди, Иису́се Христе́ Сы́не Бо́жий! Си́лою Честна́го и Животворя́щаго Креста́ Твоего́ поми́луй и спаси́ мя, гре́шнаго. Ами́нь.

Тропарь Креста, глас 1:

Спаси́, Го́споди, лю́ди Твоя́, и благослови́ достоя́ние Твое́, побе́ды на сопроти́вныя да́руя, и Твое́ сохраня́я Кресто́м Твои́м жи́тельство.

Канон, творение Григория Синаита, глас 4

Песнь 1

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Сла́ва, Го́споди, Кресту́ Твоему́ Честно́му.

Кре́сте всеси́льне, апо́столов похвала́, преподо́бных утвержде́ние, и ве́рных зна́мение, и иера́рхов и му́чеников сла́ва, побе́да и утвержде́ние всех хва́лящих тя.

Сла́ва, Го́споди, Кресту́ Твоему́ Честно́му.

Кре́сте всечестны́й, четвероконе́чная си́ла, апо́столов благоле́пие, и му́чеников кре́пость, немощны́х здра́вие показа́лся еси́, ме́ртвым воскресе́ние, па́дающим воздви́жение.

Слава: Кре́сте, ты ми си́ла бу́ди, кре́пость и держа́ва, изба́витель и предра́тник на борю́щия мя, щит и храни́тель, побе́да и утвержде́ние мое́, при́сно соблюда́я мя и покрыва́я.

И ныне: На Кре́сте, Всенепоро́чная, Твоего́ Сы́на я́ко узре́ла еси́, ору́жие ско́рбное утро́бу Твою́ растерза́, и восклица́ла еси́ рыда́ющи в боле́зни, но а́бие просла́вила еси́ Креста́ си́лу.

Песнь 3

Ирмос: Твоя́ песносло́вцы, Богоро́дице, живы́й и незави́стный исто́чниче, лик Себе́ совоку́пльшия духо́вно, утверди́, в Боже́ственней Твое́й сла́ве венце́в сла́вы сподо́би.

Сла́ва, Го́споди, Кресту́ Твоему́ Честно́му.

Кре́сте, преподо́бных ору́жие, обою́дный меч Христо́в, ве́рных удобре́ние, боля́щих исцеле́ние и заступле́ние, и воздви́жение уме́рших, всече́стне.

Сла́ва, Го́споди, Кресту́ Твоему́ Честно́му.

Кре́сте, основа́ние благоче́стия, бесо́м показа́лся еси́ губи́тель, це́рквам благоле́пие, нечести́вым поги́бель, враго́м посрамле́ние на день су́дный.

Слава: Кре́сте живоно́сный, ты ми бу́ди кре́пость и побе́да, и щит, и стена́ нера́туема, бесо́м отгна́ние, и помысло́м погаше́ние, и ума́ моего́ сохране́ние.

И ныне: Распя́тие поно́сное, Де́во Влады́чице, Твой Сын претерпе́л есть, и сме́рть неподо́бную. Но возне́сся, низве́рже проти́вныя вра́жия си́лы, я́ко безсме́ртен.

Седален, глас 8

Прообража́ше та́йне дре́вле Иису́с Нави́н Креста́ о́браз, егда́ ру́це простре́ крестови́дне, Спа́се мой, и ста со́лнце, до́ндеже враги́ низложи́, противостоя́щия Ти, Бо́гу; ны́не же за́йде, на Кресте́ Тя зря, и, держа́ву сме́ртную разруши́в, весь мир совоздви́гл еси́.

Песнь 4

Ирмос: Седя́й в сла́ве на престо́ле Божества́, во о́блаце ле́гце, прии́де Иису́с пребоже́ственный, нетле́нною дла́нию, и спасе́ зову́щия: сла́ва, Христе́, си́ле Твое́й.

Сла́ва, Го́споди, Кресту́ Твоему́ Честно́му.

Четвероконе́чный сый мир, и я́ко триобою́дный меч, нача́ла тьмы сече́ши, на́ми вообража́емь, Кре́сте, ору́жие вели́кое Христо́во, и непобеди́мое победи́тельство всеси́льное.

Сла́ва, Го́споди, Кресту́ Твоему́ Честно́му.

Твоя́ высота́, Живоно́сне Кре́сте, возду́шнаго кня́зя бие́т, и глубина́ всея́ бе́здны закала́ет зми́я, широту́ па́ки вообража́ет, низлага́я мирска́го кня́зя кре́постию Твое́ю.

Слава: Возне́сся сопривле́кл еси́ па́дшия, воздви́гл еси́ естество́ земно́е, Престо́лу Бо́жию спросла́вился еси́, Кре́сте, высото́ вели́кая, мирски́й мо́сте, ду́шу мою́ от страсте́й глубины́ вознеси́ вско́ре.

И ныне: Крестообра́зно, Пречи́стая Отрокови́це Богоро́дице, дла́ни Твоя́ распросте́рши к Воздви́женному на кресте́, и моли́твы, Де́во, ны́не принеси́, за всех ве́рно моля́щихся Тебе́.

Песнь 5

Ирмос: Ужасо́шася вся́ческая о Боже́ственней сла́ве Твое́й: Ты бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, всем воспева́ющим Тя мир подава́ющая.

Сла́ва, Го́споди, Кресту́ Твоему́ Честно́му.

Кре́сте, небе́сная ле́ствице святы́ни, степе́нем наста́вниче, Христо́ва высота́ и сла́ва еси́, Бо́жий о́браз назнамена́телен миру, неви́димому же и ви́димому, единоче́стне.

Сла́ва, Го́споди, Кресту́ Твоему́ Честно́му.

Кре́сте, о́бразе неиспи́санный си́лою, освяще́ние вода́м, очище́ние возду́ху, освяще́ние и просвеще́ние вся́кому, му́жества зна́мение, и Христо́в ски́птр непрело́жный, проти́вныя в зе́млю попира́я.

Слава: Кре́сте всеси́льне, злочести́выя низложи́ враги́, ненави́дящия и ху́лящия тя безу́мно, язы́ки попали́ и угаси́ шата́ния их. О Кре́сте всесвяты́й и Христоно́сный, сохрани́ нас держа́вою Твое́ю.

И ныне: Всех Цари́це Влады́чице, ски́птром Рождества́ Твоего́ разруши́, Деви́це, воста́ние ху́лящих кре́стную си́лу. Даждь кре́пость и очище́ние, побе́ду и по́мощь ве́рным лю́дем Твои́м.

Песнь 6

Ирмос: Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Сла́ва, Го́споди, Кресту́ Твоему́ Честно́му.

Кре́ст всех воскресе́ние, Крест па́дших исправле́ние, страсте́й умерщвле́ние и пло́ти пригвожде́ние, Крест душа́м сла́ва и свет ве́чный.

Сла́ва, Го́споди, Кресту́ Твоему́ Честно́му.

Крест враго́в губи́тель, Крест злочести́вых я́зва и плене́ние, и ве́рных держа́ва, благочести́вых храни́тель и бесо́в отгони́тель.

Слава: Крест страсте́й па́губа, Крест помысло́в отгна́ние, Крест сокруше́ние язы́ческо искуси́тельно и духово́м показа́ся лови́тельство.

И ныне: Крест воздви́жется и па́дают духо́в возду́шных чи́нове, Крест снизхо́дит, и нечести́вии вси ужаса́ются, я́ко мо́лнию ви́дяще кре́стную си́лу.

Кондак, глас 4

Вознесы́йся на крест во́лею, тезоимени́тому Твоему́ но́вому жи́тельству щедро́ты Твоя́ да́руй, Христе́ Бо́же, возвесели́ нас си́лою Твое́ю, побе́ды дая́ нам на сопоста́ты, посо́бие иму́щим Твое́ oру́жие ми́ра, непобеди́мую побе́ду.

Икос

Иже до тре́тияго небесе́ восхище́н бысть в рай и глаго́лы слы́шав неизрече́нныя и Боже́ственныя, и́хже не леть язы́ки (челове́ческими) глаго́лати, что Гала́том пи́шет, я́ко рачи́телие Писа́ний прочто́сте и позна́сте: мне, глаго́лет, хвали́тися да не бу́дет, то́кмо во еди́ном Кресте́ Госпо́дни, на не́мже, страда́в, уби́ стра́сти. Того́ у́бо и мы изве́стно держи́м, Крест Госпо́день, хвалу́ вси: есть бо нам спаси́тельное сие́ Дре́во oру́жие ми́ра, непобеди́мая побе́да.

Песнь 7

Ирмос: Не послужи́ша тва́ри богому́дрии, па́че Созда́вшаго, но о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бог благослове́н еси́.

Сла́ва, Го́споди, Кресту́ Твоему́ Честно́му.

Неразде́льную Тро́ицу и неслия́нну, естество́ еди́нством благосло́вим, Отца́ нерожде́нна, и рожде́нна Сы́на, и Свята́го исходи́тельнаго Боже́ственнаго Ду́ха, пе́сньми пою́ще: благослове́н Бог оте́ц на́ших.

Сла́ва, Го́споди, Кресту́ Твоему́ Честно́му.

Незаходи́тельными мо́лниями Твои́ми, Триипоста́сне, на́ша озари́ у́мныя о́чи, добро́ту Твою́, Трисве́тне, пресу́щественную зре́ти, я́же челове́ком недове́домая и непристу́пная Ангелом.

Слава: Луча́ми све́та Твоего́ па́дшую мою́ ду́шу возведи́ от глубины́, благи́й Бо́же, препе́тый и всеси́льный, попо́лзшуюся от све́та благода́тнаго и во тьму воглу́бльшуюся.

И ныне: Крестообра́зно просте́рши ру́це, Чи́стая, к распросте́ршему свои́ ру́це на Дре́ве Кре́стнем, и возне́сшему естество́ на́ше, и умертви́вшему вражде́бныя полки́, моля́щи не преста́й.

Песнь 8

Ирмос: Отроки благочести́выя в пещи́ Рождество́ Богоро́дично спасло́ есть, тогда́ у́бо образу́емое, ны́не же де́йствуемое, вселе́нную всю воздвиза́ет пе́ти Тебе́: Го́спода по́йте дела́ и превозноси́те Его́ во вся ве́ки.

Сла́ва, Го́споди, Кресту́ Твоему́ Честно́му.

Высота́ Христо́вых страсте́й и лук, и ору́жие, и меч, ору́жие непосты́дное, и си́ла непобеди́мая, Христо́во подно́жие и победи́тельство на враги́, зна́мения Ца́рствия, ски́птре ве́рных, показа́лся еси́, Кре́сте победоно́сне.

Сла́ва, Го́споди, Кресту́ Твоему́ Честно́му.

Воздви́гл еси́ на́ше па́дшее естество́, Христо́м распе́ншимся, совозста́вив; высото́ боже́ственная, глубино́ неизглаго́ланная, Христо́во ты еси́ зна́мение, Кре́сте пребога́те, и широта́ безме́рная, и зна́мение непостижи́мыя Тро́ицы, жизноно́сче.

Слава: Устна́ми, душе́ю же и се́рдцем Крест Госпо́день лобыза́юще, прииди́те ны́не вознесе́м вси и возвели́чим, покланя́ющеся рцем вку́пе, песнь пречи́стую, вопию́ще: pа́дуйся, вели́кое бога́тство, Кре́сте, церко́вное украше́ние.

И ныне: Дре́во жи́зни и спасе́ния, Дре́во безсме́ртия, Дре́во ра́зума, Дре́во трилюбе́зно, нетле́нно и неизнуря́емо, Крест трисоста́вный, честно́е Дре́во, Тро́ицы бо но́сит Триипоста́сныя о́браз.

Песнь 9

Ирмос: Всяк земноро́дный да взыгра́ется, Ду́хом просвеща́емь, да торжеству́ет же Безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, всеблаже́нная, Богоро́дице Чи́стая Присноде́во.

Сла́ва, Го́споди, Кресту́ Твоему́ Честно́му.

Кто слы́шана сотвори́т, я́коже пи́шется, де́йствия твоя́, миролюбе́зный Кре́сте, си́лы и чудеса́, уме́ршим воста́ние; и мир весь совозне́сл еси́, вознесы́йся к Бо́гу многожела́емый.

Сла́ва, Го́споди, Кресту́ Твоему́ Честно́му.

Утвержде́ние ве́рным Крест треблаже́нный, зна́мение и похвала́, дре́во всеси́льное, Крест Христо́в вели́кий и соверше́нный, апо́столом похвала́, преподо́бным утвержде́ние и му́чеником кре́пость и держа́ва, ве́рным побе́да и похвала́.

Слава: Ра́дуйся, Кре́сте, о́бразе неопи́санный и многоимени́тый, дре́во требога́тное, стра́шно же и всеблаже́нно; ра́дуйся, Кре́сте всесвяты́й и всеси́льный; ра́дуйся, храни́телю жи́зни на́шея, Госпо́день Кре́сте многопе́тый.

И ныне: Кре́сте Честны́й, храни́тель души́ и те́ла бу́ди ми, о́бразом свои́м бе́сы низлага́я, враги́ отгоня́я, стра́сти упраждня́я, и благослове́ние да́руя ми, и жизнь и си́лу, соде́йствием Свята́го Ду́ха, и честны́ми Пречи́стыя мольба́ми.

Светилен, глас 2

Крест храни́тель всея́ вселе́нныя, Крест красота́ Це́ркве, Крест царе́й держа́ва, Крест ве́рных утвержде́ние, Крест Ангелов сла́ва и де́монов я́зва. (Трижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Посо́бивый Го́споди кро́ткому Дави́ду победи́ти иноплеме́нника, ве́рным лю́дем на́шим спобо́рствуй, и ору́жием Креста́ низложи́ враги́ на́ша. Покажи́, Благоутро́бне, на нас дре́вния ми́лости Твоя́, и да разуме́ют вои́стинну, я́ко Ты еси́ Бог, и на Тя наде́ющиися побежда́ем, моля́щиися обы́чно Пречи́стей Твое́й Ма́тери, дарова́тися нам вели́цей ми́лости.

Молитва

О Всечестны́й и Животворя́щий Кре́сте Госпо́день, кро́вию Христа́ Бо́га на́шего освяще́нный! Ты еси́ зна́мение побе́ды на враги́ на́ша ви́димыя и неви́димыя. Ты и́маши яви́тися в час Стра́шнаго Суда́ Христо́ва. Тебе́ смире́нно покланя́юся, че́стно прикаса́юся и любе́зно тя лобыза́ю, ны́нешнее моле́ние к Распя́тому на тебе́ принося́, да исцели́т мя си́лою в тебе́ Свое́ю от все́х неду́гов душе́вных и теле́сных, и сохрани́т от враг ви́димых и неви́димых, и неосужде́нна на Суде́ Свое́м одесну́ю поста́вит. Ей, Животворя́щий Кре́сте святы́й! На Тебе́ Спас, умира́я за уме́ршия грехми́ челове́ки, дух Свой я́ко челове́к испусти́, кровь же и во́ду источи́, и си́ми треми́ еди́но, е́же па́че всех есть на потре́бу, спасе́ние нам соде́ла, во сла́ву исто́чника вод живы́х Бо́га Отца́, Себе́ же, от крове́й деви́ческих воплоще́нна Бо́га Сы́на, и Бо́га Ду́ха Свята́го, оживля́ющаго дух челове́чь, Ихже Трие́х во еди́ном Божестве́ сла́вити и мне пособи́ от воды́ креще́ния восприя́тою ве́рою непоро́чною, во прича́стии же Пло́ти и Кро́ве Госпо́дних наде́ждою несумне́нною, и в покая́нии ду́хом сокруше́нным, и любо́вию нелицеме́рною, да та́ко не то́кмо в жи́зни сей плаче́вней, я́ко вода́ мимотеку́щей, но и в бу́дущем блаже́ннем животе́ просла́влю Го́спода, посо́бием си́лы твоея́, Кре́сте треблаже́нне, и поклоню́ся Ему́ са́мым лица́ зре́нием ве́рованному, одержа́нием же ча́янному и наслажде́нием люби́мому, еди́ному в Тро́ице сла́вимому в безконе́чныя ве́ки веко́в.