Канон всем святым

Духовное Небо — сверхтаинственная область нематериального бытия — населено неисчислимым сонмом святых угодников Божиих. Достигнув обителей Вечного Блаженства, святые, словно путеводные звезды, указывают нам, живущим на земле, путь, ведущий к Вечной Радости. Из своего личного духовного опыта, который они имели в земной жизни, святые знают, как трудно христианину войти в Небесное Царство, а поэтому они всегда готовы прийти к нам на помощь в наших духовных трудах для славы Божией.

Каждому христианину очень полезно почаще молиться канон «Всем святым». В каноне содержатся молитвенные обращения — просьбы ко всем святым, живущим во все времена, чтобы они помогали нам быть верными последователями Евангельского учения, очищать душу от греховной скверны, укрепляться в добродетели, получать милости и благословения от Господа и т. д. Постоянно молясь со вниманием и усердием этот канон, мы будем иметь вокруг себя бесчисленное множество незримых молитвенников, которые будут возносить за нас каждое мгновение молитвы к Господу. Их богоугодные молитвы будут помогать нам всегда: и днем, и ночью; и в пути, и дома; и в скорби, и в радости; в момент нашего перехода в Вечность, и тогда, когда наша душа будет проходить сорокадневные мытарства; они помогут нам и в День Страшного Суда Христова…

Молитва нашей душе нужна, как воздух и тепло для тела. Поэтому, если мы сами не можем непрестанно молиться, молиться горячо и усердно, молиться так, чтобы Господь отвечал на наши молитвы, будем просить в своих молитвах святых, чтобы они были непрестанными молитвенниками за нас.

——————————————————————

Общее начало и конец всем канонам →
Порядок чтения по уставу
——————————————————————

Тропарь, глас 4-й

Иже во всем мире мученик Твоих Господи: яко багряницею и виссом кровьми их, Церкви Твоя украсившися. Теми вопиет Ти Христе Боже, людем Твоим щедроты Твоя низпосли, и мир граду Твоему даруй, и душам нашим велию милость. (Дважды).

Слава, и ныне. Богородичен. Иже от века утаенное, и ангелом несведомое таиньство. Тобою Богородице земным явися, Бог в неразмесне снятии воплощаемь. И крест волею нас ради восприим, им же воскресив первозданнаго, и спасе от смерти душа наша.

КАНОН, глас 8-й

Песнь 1. Ирмос

Вооружена фараона погрузи, чюдотворяи древле, Моисейскии жезл крестообразно прорази, и раздели море, Израиля же бежаща, пеша ходяща спасе, песнь Богови возсылающа.

Запев: Святии вси, молите Бога о нас (поклон).

Твоих святых воспевающу чины, Твоим светом души моей, молитвами сих озаритися молюся. Ты бо еси Свет неприступен, неведения весь мрак отжени от мене Твоими светлостьми, Слове Божии Светодавче Христе.

Запев. Егда вознесеся на древо, привлекл еси ко Своему познанию, языком все наследие Твое Владыко, и светом уяснил еси Святыя Троицы, апостолы святыми Твоими, и мглу прелести отгнал еси.

Запев. Законоположением Твоим Христе, образуеми Твои апостоли, яже на земли вся благочестно отринуша. И светом благодати осветиша всю вселенную славнии, благовестно Тя проповедающе.

Слава. Радующеся мученицы крест Твой вземше, и честной страсти неуклонно подобящеся. Мучительскаго не устрашишася прещения доблии, ни огня, ни меча, ни ран, но ниже глада, ниже смерти.

И ныне. Богородичен. Изволение мужеско Девы всечистая восприемше, яве мученическими страданьми, крепко пострадавше, и псаломски во след Тебе и Сыну Твоему Дево, божествене срадующеся, Всецарю приведошася.

Катавасия: Избавите от бед рабы своя, святии вси, яко вси по Бозе к вам прибегаем, вы бо молите о нас Христа Бога нашего (поклон). Господи помилуй (трижды с поклонами).

Песнь 3. Ирмос

Утвержеи небеса в начатце разумом, и землю на водах основавыи, на камени мя Христе церковнем утверди, яко несть свята, паче Тебе Человеколюбче.

Запев. В священство священно, священницы и пастырие облекшеся, и то премудрствено окормивше Христу, житием украсиша. Учительства слово святии свыше воистину приемше, обогатишася.

Запев. Украсившеся удобреньми перваго добротворения, явишася яко незаходящая светила, и онебесисте Церковь Христову отнюд красно вси святии, ту различно украсивше.

Слава. Закону повинующеся Твоему, блаженных собори, многообразными добродетельми просветившеся, наследоваша обители небесныя Владыко, и отъинуду ин, вси тыя достойно исполниша.

И ныне. Богородичен. От чрева девствена, еже от Бога, Бога Слова родила еси нам Богомати. Его же девы чистыя боголепно возлюбиша, и во след Тебе вся Сему яве последоваша. Катавасия.

Седален, глас 8-й. Претерпевше, горы терпения явистеся, и столпи духовнии, мученицы прехвальнии Христа Бога нашего, от земли вземшеся на высоту, преложением к небесней славе, самовидцы бывше. Тем же по достоянию обогатившеся благодатию Духа. Всегда исцеление подаваете, страстотерпцы прехвалнии, молите Христа Бога, согрешением оставление даровати, празднующим любовию святую память вашу.

Другой седален, глас той же. Праотец, отец, патриарх, апостол, мученик и пророк, святитель, преподобных и праведных, и всех святых Твоих, вкупе и жен божественое сословие, святую память творяще Христе Боже. Всех подвизаем на молитву, молящеся, умири мир Свой тех ради, яко Человеколюбец, да вси вопием Ти, Боже прославляемыи во свете святых Твоих, яко воистину прославляяи достойно память их.

Слава, и ныне. Богородичен. Небесную дверь и ковчег, пресвятую гору, и светлыи облак воспоем, Неопалимую купину, словесныи рай, и Еввы воззвание. Вселенней всей великии сосуд, яко спасение в нем соделася мирови, и оставление древним согрешением. Темже и вопием Ей, моли Христа Бога, согрешением оставление даровати, благочестно поклоняющимся (поклон) пресвятому рожеству Твоему.

Песнь 4. Ирмос

Ты ми Христе Господь, Ты же и сила ми, Ты ми Бог, Ты ми радование, не оставль недра Отча, но милостию си нашу нищету посетив. Тем с пророком Аввакумом зову, силе Твоей слава Человеколюбче.

Запев. Совокупився собор святых Твоих, ради любве, и Тебе наслаждаяся истинно же и чисто, в радости лик неразрушаемыи со ангелы ликует, о Тебе Всеведце Бозе всех и Господе.

Запев. Юношски славнии священномученицы, мученическим венцем увязостеся, богодетельным помазанием, иже первее священства украшени пребогатии. Тем же сугубы венцы по достоянию приемше, со Христом вечно радуетеся.

Запев. Плотьское мудрование все, Духу богоноснии воистину повинусте, воздержательно, тоя стремления неудержимая постом увядивше. И ныне безстрастия светом просветившеся, мзду трудом приясте.

Слава. Яко Христови мученицы, первомученика муки зело претерпесте, тверде же и доблествене, яко в чюжих страждуще телесех славнии. И ныне царствия наследницы показавшеся, верным цельбы точите.

И ныне. Богородичен. Невесто Божия пребысть Богородительнице, сего бо Слово Превечное, телесне родила еси нам. О Нем же и жены святыя свято пожившыя, честьми всеразличными Тобою украсившеся, праматернее падение исправиша. Катавасия.

Песнь 5. Ирмос

Вскую мя отрину от лица Твоего Свете незаходяи, покрыла мя есть чужа тма окаяннаго. Но обрати мя, и к свету заповедей Твоих, пути моя направи молютися.

Запев. Прозрети яко пророцы божествении, последняя хотящая быти сподобистеся. Воздержанием бо полезне душы очистивше, житием чистым, о, богогласнии, просвещаеми силою Святаго Духа.

Запев. Лик всех святых ныне светится, божествеными дарованьми, иже прежде закона вси отценачальницы, пророцы и апостоли, и мученик собори, и постник и учителей и праведных, и священномученик.

Слава. Светящься зряще, Твоих святых собор днесь, Твоею Спасе светлостию, и свещами неугасаемыми благодати, Твое божественое богатьство благих и спешьство, воспеваем непрестанно Человеколюбче.

И ныне. Богородичен. Предивное Твое рожество, возлюбивше жены боголюбивыя, красная жития нивочто же вмениша Всечистая. Но Его едины рачително желающе светлости, и божественаго осияния. Катавасия.

Песнь 6. Ирмос

Очисти мя Спасе, многа бо беззакония моя, и из глубины зол возведи мя молюся. К Тебе бо возвах, и услыша мя, Боже спасения моего.

Запев. Яко честен избран, положен камень краеугольныи, святии в Сионе обретше Тя Владыко, утвержение непоколебимо, избранная камения себе наздаша.

Запев. Прободеным Ти ребром, капли крове искапавше с водою, богодетелно весь мир обновиша, и божественыи Собор всех святых, к Благодателю прилепиша.

Слава. Поем вси благочестно мученик облак божественыи, просвещеныи благодатию свыше, пресветло восиявшии, и светлейшии, багряницею крове, и червленицею тех твердаго страдания.

И ныне. Богородичен. Матерь всеистинную Божию Тя вси знаем, Ея же ради естество женское исцеле, и укрепившися Всенепорочная о Христе пострада, добродетели же всякия и благочестия бысть исполнено. Катавасия.

Слава, и ныне. Кондак, глас 8-й. Яко начатки естества, Содетелю твари, вселенная приносит Ти Господи богоносныя мученики. Тех молитвами в мире глубоце, Церковь Свою и жительство Свое Богородицы ради соблюди, едине Многомилостиве.

Икос. Иже по всей земли мучившиися, и на небеса преселившеся. И иже страстем Христовым подобящеся, и страсти наши отъемлюще, се зде днесь собираются, первенцы рожденых явльшеся Церкви вышния. И яко горнии образ причаствуем имуще, Христу вопиют, Богородицы ради соблюди, яко Бог наш, Ты еси Многомилостиве.

Песнь 7. Ирмос

Божия схождения, огнь устыдеся в Вавилоне древле. Сего ради отроцы в пещи радованною ногою яко во свете ликоваху, поюще, благословен Бог отец наших.

Запев. Святых чинове, иже во святых почивающему, немолчно вопиюще, пищи божественыя ныне наслаждаются, и радующеся ликуют поюще. Отец наших Боже благословен еси.

Запев. Божествеными сияньми, трисолнечнаго светопролития, честнии святых собори облиставшеся, и Единицу тричисленую богословяще, воспевают радующеся, благословен Бог отец наших.

Запев. Неизреченною славою Твоею, егда явишися стоя посреде богов, достойная воздаяи, и венцы тайн, и дары даруя, тогда мя Спасе сподоби пети Тебе, благословен Бог отец наших.

Слава. Радующеся поем, Твоих святых всех собор, от всюду собравшихся, и роды вкупе и достоинства, и жительства, с ними поюще зовем, благословен Бог отец наших.

И ныне. Богородичен. Марию пречистую и пресвятую Богородителницу, отроковицы вся, лик божествен купно составивше, велегласно возопийте, радуися, яже радости источник нам источающи. Катавасия.

Песнь 8. Ирмос

Седмь седмицею пещь, халдейскии мучитель, богочестивым люте разжже, силою же лучшею, спасеных видев, Творцу и Избавителю вопияше, дети благословите, священнии воспойте, людие превозносите Его во веки.

Запев. Радуйтеся мученицы, и пророцы со апостолы, священномученик честныи собор, праведных и преподобных, и учителей божествении лицы, с мироносицами женами вопиюще, дети благословите, священнии пойте людие, и превозносите Его во веки.

Запев. Иже паче ума светлостьми, насыщаеми святии божественаго веселия, и благодати исполняеми, бози бываете, иже к Богу приближением, благодеянным светлостем приобщающеся, и славы неизреченныя просветившеся лучами, Христа превозносяще во веки.

Слава. Явившеся святии яко звезды многосветлы, церковное небо уясняете, различными благодатьми, и светлыми добротами, в правду, и в целомудрие и мужество и мудрость оболкшеся, Владыце взывающе, священнии пойте людие, и превозносите Его во веки.

И ныне. Богородичен. С веселием вся жены богомудрыя скончавшыяся, поют Духом Деву пречистую, истинную Матерь Божию, Юже от клятвы праматере Еввы нас избавльшую, и благоговейно предстояще, иже Тоя воспевающе Плод во веки. Катавасия.

Песнь 9. Ирмос

Удивися убо о сем небо, и земли ужасошася концы, яко Бог явися Человеком плотию, и чрево Твое бысть пространнее небес. Тем Тя Богородице ангел и человек чиноначалия величаем.

Запев с поклоном. Надеждею и любовию вооружено, и верно ограждено, счинение избранных, вся мучителей прилоги, и муки и раны, радующеся претерпеша. Благославно от Христа обогатившеся, и лика верховных достигоша, еже истинне первомученика.

Запев. Пристанище спасения, крестителя, апостолы, пророки и мученики, спостники и божественыя учители, и священники и патриархи имуще, и священномученики, благославныя жены и боголюбезны, и преподобныя и праведныя, ныне достойно величаем.

Слава. Огнем искусившиися напастей, и пищею не усладившиися, веселитеся, и чисте престолу Владычню световидни предстояще славнии, собори святых на небесех, разрешившимся зерцалом, сени бо мимошедши, истинными явленьми.

И ныне. Богородичен. Явися разстоящимся совокупителна, Тебе бо ради ангелом единоселницы на небесех, человецы быша воистину. И свидетельствуют чинове всех святых, и с ними поюще Твое рожество Дево Богомати, в вечных песнех. Катавасия.

Отпуст: Господи Исусе Христе, Сыне Божии, молитв ради пречистыя Твоея Матере, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.

Канон всем святым от века Богу благоугодившим

Каноны и акафисты на каждый день седмицы

Тропарь, глас 2-й

Апо́столи, му́ченицы и проро́цы, святи́телие, преподо́бнии и пра́веднии, до́бре по́двиг соверши́вшии и веру соблю́дшии, дерзнове́ние иму́ще ко Спа́су, о нас Того́, я́ко Бла́га, моли́те спасти́ся, мо́лимся, душа́м на́шим.

Канон, глас 8-й

Песнь 1

Ирмос: Песнь возсле́м лю́дие чу́дному Бо́гу на́шему, свободи́вшему Изра́иля от рабо́ты, песнь побе́дную пою́ще и вопию́ще: пое́м Тебе́ Еди́ному Влады́це.

Припев: Вси святи́и, моли́те Бо́га о нас.

Проро́ческий собо́ре, апо́стольское сосло́вие, му́ченик во́инства, Влады́ку всех моли́те спасти́ся мне, прегреше́нии мно́гими обдержи́мому.

Вси святи́и, моли́те Бо́га о нас.

Иера́ршеский собо́ре, преподо́бнии и пра́веднии вси, благ ве́чных улучи́ти моли́теся, ве́рою вас блажа́щим.

Слава: Всех святы́х Твои́х, Го́споди, воспева́ем чи́ны, я́ко моли́твами их озаря́еши ду́ши на́ша: Ты бо еси́ Свет непристу́пный, неве́дения мрак отгоня́яй, присносу́щными Твои́ми све́тлостьми.

И ныне: Пресвята́я Де́во Ма́ти, я́же Бо́га, Пресвято́е Сло́во, родила́ еси́, освяти́ всех ве́рою Тя со все́ми святы́ми сла́вящих, мо́лимтися.

Песнь 3

Ирмос: Ты еси́ утвержде́ние притека́ющих к Тебе́, Го́споди, Ты еси́ Свет омраче́нных, и пое́т Тя дух мой.

Вси святи́и, моли́те Бо́га о нас.

Свяще́ннейший лик вас Боже́ственных проро́к велича́ем, и му́ченик мно́жество, пострада́вших кре́пко, почита́ем моля́щеся: да ю́же сла́ву получи́сте, сея́ и мы прича́стницы бы́ти сподо́бимся ва́шими моли́твами.

Вси святи́и, моли́те Бо́га о нас.

Святе́йшии Христо́вы иера́рси, и честни́и преподо́бных собо́ри, со все́ми святы́ми о всех нас Человеколю́бца Бо́га моли́те, мо́лим вы.

Слава: Зако́ну повину́ющеся Твоему́, уго́дников Твои́х собо́ри, многообра́зными доброде́тельми освети́шася: сего́ ра́ди насле́дницы бы́ша оби́телей Твои́х Небе́сных, Влады́ко Царю́: и́хже моли́твами, да и нас та́можде всели́ши, Преми́лостиве.

И ныне: Богора́дованная Чи́стая, со все́ми проро́ки, му́дрыми, апо́столы, священному́ченики и со все́ми пра́ведными, моли́ Го́спода, я́ко да соверше́нное разреше́ние прегреше́ний прии́мем.

Песнь 4

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Вси святи́и, моли́те Бо́га о нас.

Восхваля́ем вас, благоглаго́ливии проро́цы, и воспева́ем богови́дцы апо́столи, со все́ми до́бре о Го́споде тече́ние соверша́вшими: я́ко да моли́твами ва́шими и мы настоя́щаго жития́ тече́ние богоуго́дно соверши́ти возмо́жем.

Вси святи́и, моли́те Бо́га о нас.

Я́ко многосве́тлыя зве́зды, доброде́телей све́тлостию озаря́ете ве́рных исполне́ния, преподо́бнии отцы́ на́ши, и вся Бо́жии уго́дницы: сего́ ра́ди вас ублажа́ем.

Слава: Совоку́плься собо́р святы́х Твои́х, Го́споди, ра́ди любве́, и тоя́ наслажда́ющеся, со А́нгелы лику́ет о Тебе́, Всеви́дче Го́споди всех: е́гоже ликовствова́ния да и нас сподо́биши, моли́твами уго́дников Твои́х, Всеси́льне.

И ныне: Еди́на Бо́га Воплоще́ннаго ро́ждши, Всесвята́я, Того́ умоли́ в день стра́шный всех нас спасти́, и жи́зни ве́чныя, и све́та сподо́бити, его́же зрят вси до́бре угоди́вшии.

Песнь 5

Ирмос: У́тренююще вопие́м Ти, Го́споди, спаси́ ны: Ты бо еси́ Бог наш, ра́зве Тебе́ ино́го не ве́мы.

Вси святи́и, моли́те Бо́га о нас.

Святи́телие, проро́цы, преподо́бнейшии отцы́ и богоно́сцы, луча́ми Ду́ха просвеща́юще всю тварь, тму разоря́йте страсте́й на́ших, мо́лим вы.

Вси святи́и, моли́те Бо́га о нас.

Ра́ны ва́ша и я́звы, врагу́ яви́шася я́звы неисце́льныя: я́звы же ны́не исцеля́ют всем ве́рным, страда́льцы Госпо́дни.

Слава: Иера́рхи Твоя́, и священному́ченики, и вся святы́я просвети́вый, Го́споди, тех моли́твами уще́дри мя, ве́дый безме́рная моя́ прегреше́ния.

И ныне: Пречи́стая Де́во, похвало́ му́чеников, преподо́бных и пра́ведных, и всех святы́х, от вся́каго мучи́тельства лука́ваго изми́ мя, молю́ся.

Песнь 6

Ирмос: Ри́зу мне пода́ждь све́тлу, одея́йся све́том я́ко ри́зою, Многоми́лостиве Христе́ Бо́же наш.

Вси святи́и, моли́те Бо́га о нас.

Денни́ца светоза́рная позна́ни бы́сте на земли́, благоче́стия све́том озари́вше ве́рныя, пресла́внии Христо́вы ору́жницы и святи́телие пра́веднии.

Вси святи́и, моли́те Бо́га о нас.

Умерщвле́ни бы́вше ран мно́гих наведе́ньми, жизнь и́стинную насле́довасте: вку́пе моли́те Христа́ спасти́ вся ве́рныя, святи́и му́ченицы.

Слава: Сла́ва прему́дрым святи́телем, и преподо́бным, и всем святы́м, Ты еси́, Христе́: моли́твами их лю́ди Твоя́ уще́дри, и́хже Свое́ю кро́вию, я́ко Человеколю́бец, стяжа́л еси́.

И ныне: Воспева́ем Тя ве́рнии, Богора́дованная Влады́чице: Препе́таго бо Бо́га роди́ла еси́. Его́же моли́, Пречи́стая, гра́ду и лю́дем Твои́м в ми́ре спасти́ся.

Кондак, глас 8-й

Я́ко нача́тки естества́ Насади́телю тва́ри, вселе́нная прино́сит Ти, Го́споди, богоно́сныя му́ченики: тех моли́твами в ми́ре глубо́це, Це́рковь Твою́, жи́тельство Твое́, Богоро́дицею соблюди́, Многоми́лостиве.

Икос

И́же по всей земли́ му́чившиися, и на Небеса́ пресели́вшиися, и́же стра́сти Христо́вы подража́вшии, и стра́сти на́ша отье́млющии, зде днесь собира́ются, перворожде́нных показу́юще Це́рковь, я́ко го́рния о́браз содержа́щу, и Христу́ вопию́щу: Бог мой еси́ Ты, Богоро́дицею соблюди́ мя, Многоми́лостиве.

Песнь 7

Ирмос: О́троцы благочести́вии в Вавило́не о́бразу злато́му не поклони́шася, но посреде́ о́гненныя пе́щи ороша́еми, песнь воспева́ху, глаго́люще: превозноси́мый отце́в и нас, Бо́же, благослове́н еси́.

Вси святи́и, моли́те Бо́га о нас.

Святы́х чи́ни, во святы́х почива́ющаго немо́лчно восхваля́юще, пи́щи небе́сныя наслажда́етеся, и ра́дующеся лику́ете пою́ще: отце́в на́ших Бо́же, благослове́н еси́.

Вси святи́и, моли́те Бо́га о нас.

Светозра́чнии святи́телие, и преподо́бнии, и проро́цы, и священному́ченик досточу́дное мно́жество, и в по́стничестве просия́вшии све́тло, при́сно о нас моли́теся, да поми́ловани бу́дем, пою́щии с ва́ми: отце́в на́ших Бо́же, благослове́н еси́.

Слава: Ра́дующеся пое́м Твои́х, Го́споди, всех святы́х собо́р отвсю́ду собра́вшихся, и ро́ды вку́пе, и досто́инства, и жи́тельства, и с ни́ми пое́м зову́ще: отце́в на́ших Бо́же, благослове́н еси́.

И ныне: С му́ченики, Пречи́стая, с преподо́бными отцы́, с проро́ки и все́ми святы́ми, во святы́х Еди́наго Почива́ющаго умоли́ всех освяти́ти нас, славосло́вящих Тя во вся ве́ки.

Песнь 8

Ирмос: Богоглаго́ливии о́троцы в пещи́, со огне́м пла́мень попира́юще поя́ху: благослови́те дела́ Госпо́дня, Го́спода.

Вси святи́и, моли́те Бо́га о нас.

Святи́телие, проро́цы, апо́столи, му́ченицы и вси святи́и, по́двиг сконча́вше, свяще́нное улучи́сте водворе́ние со А́нгелы: с ни́ми же проси́те очище́ния всем нам и ве́лия ми́лости.

Вси святи́и, моли́те Бо́га о нас.

Умертви́вше плоть боле́зньми мно́гими, жи́зни сподо́бистеся бу́дущия, преподо́бнии: ю́же получи́ти и нам моли́теся, уго́дницы Бо́жии, мо́лим вы.

Слава: Свяще́нницы Твои́, Христе́, пра́вдою облече́ни преподо́бне и вси святи́и от ве́ка, ны́не ку́пно ра́дуются, Твою́ добро́ту зря́ще Боже́ственную ясне́йше: ю́же зре́ти и нас, ра́ди святы́х Твои́х предста́тельства сподо́би, Человеколю́бче.

И ныне: Богороди́тельнице Чи́стая, со все́ми проро́ки, и му́ченики, и преподо́бными, священному́ченики и со все́ми святы́ми, уще́дрити нас Всеми́лостиваго Спа́са моли́, мо́лимтися.

Песнь 9

Ирмос: Вои́стинну Богоро́дицу Тя испове́дуем, спасе́ннии Тобо́ю, Де́во Чи́стая, с безпло́тными ли́ки Тя велича́юще.

Вси святи́и, моли́те Бо́га о нас.

Вас, священноде́йственнии па́стырие, проро́к святы́х лик, пра́ведных безчи́сленное мно́жество, му́ченик собо́р, по́стников, де́вственников и всех святы́х, свяще́нными пе́сньми ублажа́ем, да мо́лите всех Вла́дыку о спасе́нии душ на́ших.

Вси святи́и, моли́те Бо́га о нас.

Я́ко служи́телие Влады́це, священнотаи́нницы я́вльшеся, совокупи́стеся служи́телем небе́сным: с ни́миже о нас моле́ния приноси́те, мо́лим вас.

Слава: Со священному́ченики ку́пно, и со все́ми проро́ки, ублажа́ем вся преподо́бныя и пра́ведныя, де́вы и же́ны све́тло до́блествовавшия: тех мольба́ми, Христе́, изба́ви гее́нны ду́ши на́ша.

И ныне: Щедролюби́ваго Бо́га ро́ждшая пло́тию, со святы́ми все́ми моли́ Того́ при́сно от бед спасти́ нас, всегда́ Тя велича́ющих, Ма́ти Де́во Чи́стая.

Молитва всем святым

Боже святый и во святых почиваяй, трисвятым гласом на небеси от Ангел воспеваемый, на земли от чело­век во святых Своих хвалимый: давый Святым Твоим Духом комуждо благо­дать по мере дарования Христова, и тою поставивый Церкви Твоей святей овы Апостолы, овы пророки, овы же благовестники, овы пастыри и учите­ли, их же словом проповеди. Тебе Самому действующему вся во всех, мнози совершишася святии в коемждо роде и роде, различными добродетельми благоугодившии Тебе, и к Тебе нам образ добрых подвигов своих оставивше, в радости прешедшии, готови, в нем же сами искушени быша, и нам напаствуемым помогати. Сих святых всех воспоминая и их бого­угодное похваляя житие, Тебе Самаго, в них действовавшаго, восхваляю, и онех благотворения Твоя дарования быти веруя, прилежно молю Тя, Святе святых, даждь ми грешному последовати их учению, паче же Твоею вседействующею благодатию, небесныя с ними сподобитися славы, хваляще пресвятое имя Твое, Отца и Сына и Святаго духа во веки. Аминь.

Молитва вторая

О преблаженнии угодницы Божии, вси святии, предстоящии Престолу Пресвятыя Троицы и наслаждающиися неизреченнаго блаженства! Се ныне, в день общаго вашего торжества, милостивно призрите на нас, меньших братий ваших, приносящих вам сие хвалебное пение и ходатайством вашим просящих милости и отпущения грехов у Преблагаго Господа: вемы бо, воистинну вемы, яко вся, елика восхощете, испросити у Него можете. Темже убо смиренно молимся вам: молите милостиваго Владыку, да подаст нам дух вашея ревности к хранению святых Его заповедей, яко да текше по стопам вашим, возможем земное поприще в добродетельном житии без порока прейти и в покаянии достигнути преславных селений райских, и тамо купно с вами прославляти Отца и Сына и Святаго Духа, во веки веков. Аминь.

Канон всем преподобным отцем, иже в велицей России в посте просиявшим, составленный соловецким насельником архимандритом Сергием (Шелониным; †1667), воспроизводится по публикации: О. В. Панченко. Из археографических разысканий в области соловецкой книжности: II. «Канон всем святым, иже в Велицеи Росии в посте просиявшим» — сочинение Сергия Шелонина // Труды Отдела древнерусской литературы ИРЛ РАН. 2004. Т. 56. С. 453 – 480. Канон был опубликован по списку РНБ, Соловецкое собр., № 877/987, л. 242 об. – 256. Текст выкладывается без приведения к нормам новоцерковнославянского языка.

Канон всем святым, иже в Велицеи Росии в посте просиявшим
Творение священноинока Сергия
Тропарь. Глас 4. Яко звезды многосветлыя на тверди церковнеи восиявше, / осветили есте сердца верных добродетелми подвиг и чюдес ваших, / во плоти яко ангели на земли показастеся пощением, / насаждени бысте яко древо при водах воздержания, / напоени струями слез ваших, и скверну омысте, / сего ради явистеся приятелище Божия Духа, / отцы преподобнии, молите Христа Бога спастися душам нашим.
Канон. Глас 8.
Песнь 1. Ирмос. Поим песнь Богу, иже от горкия работы фараоновы свобоже Израиля, и огненным столпом и светлым облаком наставльшему, яко прославися.
Житием богодухновенным воистинну раи явистеся Церкви Христове, блаженнии отцы вси по имени, о нас молитву Господеви творите непрестанно.
Радуися, мнихом в Руси первыи наставниче Антоние преславне. Никоне богоносе, печерская слава, Исаакие — ангеле, держава безмолвию, и Иларион духоносныи.
Красуися воистину сосуде Божии Феодосие священнодушне, Феодор и Василие, цвети пустыннии, Алимпие, Спиридон, Арефа, Герасим, светлии бисерие.
Сияет яко звезда на небеси в постницех Евстратие, и божественыи Дамиан, озаряет же ся с сими великии Матфеи, и Агапит чюдныи, аще кто ин, с сими облистает.
Гора жития высока явися Григорие, страдалец же чистоте Иоанн многотерпеливыи, с ними Кукша священныи мученик с Пимином постником, столп же церкви и терпения с Никоном Сухим явися.
Моисея и Варлама величаю иже о чистоте течения же и страдания, благодеяние же Прохорове хвалю, почитаю и Лаврентиевы добродетели.
Слава: Триединого естества пою Лица составна: нерождена Отца, Сына рожденаго и Духа Святаго, безначално царство и Божество едино.
И ныне: Радуися, пресвятыи Храме, руно богоносное, запечатленныи источниче безсмертныя струя, стадо свое, Владычице, сохрани от всех борющих невоевано.
Песнь 3. Ирмос. Небесному кругу верхотворче Господи, церкви Зиждителю, Ты мене утверди в любви своеи, желанием си краи, и верным утвержение, Едине Человеколюбче.
Благоухания ныне исполняемся, яко в раи другии текуще богонасажденных добродетелеи постник, иже в воздержании и слезах процветоша, различне плодоносяще жития, Богу присвоишася.
Великии Антоние птичие житие пожив яко ангел, новыи Иов паки — твердыи Пимин, Афонасие же божественыи, иже безсмертию тезоименитыи, и славныи Феофил с сими да почтен будет.
Высотою жития небеснаго был еси, о Варламе, дом премудрости, прозрети, якоже божествении пророцы безвестная и таиная, еже где Божиим судбам возбытие сподобися, полезная бо души очистив, о богогласе, просвещаем силою Святаго Духа.
Хвалами да почтени будут Афонасие и Стефан всеизряднии пастырие, скудыи Дионисие со Антонием, великии князь Никола, нареченныи Святоша, знаменьми и чюдесы на земли явися высок.
Кирил, белозерская слава и похвала, и богоприятныи Ферапонт да похвалится, со Александрома двема, в пощении твердыми и славно чюдесы осиявшима, иже в чюдесех мног делом же и словом Михаил Клопскии, Амфилохие же и Андроник, началницы и утвержение мнихом.
Звездам заря послушания, жизнь лучших показа, яко два светилника, сияюща нам, Никона же и Саву богомудрыя, с сими и безименитии, яко подобноименни, да поются.

Слава: Пресовершенная Единице, Пребожественыи и Трисоставныи, Нерожденныи Отче, и Сыне Единородныи, Душе, от Отца исходяи, Сыном же являем, Существо Едино и Единьство, Господьство и Царство, спаси всех нас.
И ныне: Неизглаголанно чюдо Твоего Рожества, Мати Дево: како бо рождаеши и чиста еси в том же, како Отроча раждаеши, и неразумееши отнюдь искуса мужска? — яко: «весть иже паче естества из мене новолепно Слово Божие рождьшееся».
Седален, глас 8. Антониеву кротость и чистоту Феодосия, великого и чюднаго, Павлово безмолвие, Сергия славное, и прочих преподобных отец чюдеса, вернии, прославим, и почтем песньми, с ними же и Петра, каменя вере, воспоем со всеми святители богомудрыми, и согласно вопием: молите Христа Бога согрешениом оставление даровати чтущим любовию святую память вашу.
Слава, и ныне: Небесную дверь и ковчег, пресвятую гору, светлыи облак воспоем, неопалимую купину, словесныи раи, Еввино возведение, вселеннеи всеи великии сосуд, яко в том соделася спасение миру и оставление первым согрешением, тем же и вопием Еи: моли Христа Бога согрешением оставление даровати благочестно покланяющимся пресвятому Рожеству твоему.
Песнь 4. Ирмос: Из горы присенныя Слово пророк, из единыя Богородица хотящу воплотитися, боговидно разсмотрь и со страхом славословяще силу твою.
В другии раи входяще добродетелеи чюдных отец, сих вкусим присноживотнаго дарования одушевленныя пища, тепле восхваляюще их.
Светилник миру явися огнесветлыи в пощении Димитрие, и с ним озаряют житием Корнилие и Сергие, и сопросияет деяньми Григорие пребогатыи.
В песнех да восхвалится прехвалныи Саватие, постивыися в Соловецком отоц. изрядно, и всю уяснивыи тварь светлолучными чюдес своих сиянии.
Да почтен будет Евфимие, пресветлая звезда, денница Авраамие, Сава Вишерскии всеславныи с Крыпетцким всепетым, с ними же и богодухновенныи Евфросин, иже делы и чюдесы облиставша конца.
Честь добродетелем Макарие Колязиньскии, Унежьскии же — хвала благочестия, проповедается с сими Никита славныи, с Григорием же — Касиян вкупе предобрыи.
Песньми восхвалим священными великаго Германа, иже во отоце Соловецком светло постившагося, светилника великого всеи вселеннеи, егоже молитвами спасаемся вси.
Слава: Умовидно несекомое существо в единорасленую Троицу простирающе, единого Бога надо всеми исповедаем и составы три проповедаем.
И ныне: Радуися, Божие пространное вместилище, радуися, ковчеже Новаго Завета, радуися, ручко, из нея же манна небесная дастъся всем человеком.
Песнь 5. Ирмос: Страстеи мя мглы, яко от нощныя глубины, избавляя, утреневати сподоби дух мои, Владыко, молюся, светом дневным твоих повелении, Христе.
Едемского рая, приидете, видим цветы присноживотныя, богонасажденая здания отец тщания, имже есть един делатель Господь.
Нила струями словесными напаяется всяка душа мысленая, Леонид же с Филимоном житием сияют, со Иоанном же и Логгин красится с ними.
Феодор с сынома добродетелми блистая, просвещает нас, великии же князь Александр Невскии, паче же богомудрыи великии князь Даниил; князя же Петра с Феврониею кто достоино славит от земных.
Песнь Александру, сеи приснославныи царь страстем, хвала Павлу, емуже поработа зверь, повинуяся ему добродетелнаго ради совершения, слава и Герасиму отцу с Генадием, Христовым угодником.
Достодолжно да почтется преславныи воистину Пафнотие, яко высокии, возбраняя же бесовы, Авраамие всеблаженныи, да славится Козма равносветлыи.
Небо четверосветлое явися на земли двоица сия сугубая — Ефреми тезоименитии, со Ияковом Тихон, и Евфимие славныи с Харитоном с сими да почтени будут.
Слава: Составми треми, аще и естеством едино Божество есть, в неже верно крестихомся и Единому служим — Отец, Слово и Дух срасленыи.
И ныне: Радуися, миру славо, Богородице Марие всепетая, радуися, главизно божественаго соединения Сына Божия к человеком, чистая.
Песнь 6. Ирмос: Одержима приими мя, Милосерде, от прегрешении многих припадающа к щедротам твоим; яко пророка, Господи, спаси мя.
Чюднии и всечестнии отцы наши, ихъже божественая страдания, ихже чюдеса, их же исцеления, кто бо паче сих показа знамением крепость.
Светло да похвалится, яко светилом светилник, преславныи воистинну Сергие, иже трикратным проглашением во чреве матерни прославив Святую Троицу и чистым житием своим просвети всю подсолнечную, и чюдесы своими озаряя вселенныя конца.
Посреде звезд яко солнце, имже бе началник, священныи Зосима облиста, с ними же озаряет и Саватие деянии, с Василием и со Исаиею досточюдным.
Звезды сияют другия пакы пресветлы — по образу светоносныи Иоанн, с Даниилом, и с Герасимом, и сДосифеом, и со множаишими инеми иже в Соловецкои киновии славно просиявшими.
Василия всеславнаго пою с Максимом всепетым и с Прокопием чюдным, с ними же и Исидора Твердого со Иоанном воспеваю, хвалю чюднаго и великого Николу Кочанова.
Святое и славное отец множество, помянутое и безименитое, избавите от бед иже с верою творящих памяти ваша.
Слава: Тя, Троице пребезначалная и божественая Единице, свет и светы, пою, живот и животы, — Ум, Слово, Дух же Всесвятыи — и свята Единого Бога.
И ныне: Радуися, Марие Дево Богородице, радуися, Престол. Господень, радуися, Лествице, яже человеческии род горе возведеши от земля ко Христу Богу.
Кондак. Глас 4. На высоте Господь воздержания воистину вас постави, яко звезды нелестныя, просвещающа конца, наставницы, всечестнии отцы наши.
Икос. Храми Богу яко воистинну себе соделасте, всечестнии отцы, божествеными добродетелми вашими мудре украсисте, яко злато издалеча, веру и надежду и любовь истинную; божественнии обети положисте: воздержанием постистеся, яко бесплотни, мудрость, мужество, целомудрие стяжаете, смирением же вознесостеся; темже и просвещьшеся молитвами непрестанными, видении таиными окрилатесте, небесная достигосте жилища; мы же недостоинии от непостизающаго ума нашего добродетелеи ваших приносим вам малое сие пение, радостию, божественою любовию почитающе всехвалную и всечестную память вашу, глаголюще: радуитеся, гражданя горняго Иерусалима, небеснии человецы, земнии ангели, господни оружницы, бесом сопротивоборцы и низложители, звезды всесветлыя мысленыя тверди, таинаго Сиона необоримии столпи, миродохновеннии цвети раистии, всезлатая уста Слову, росииская похвала, вселеннеи украшение, прилежно молитеся Господеви о душах наших, наставницы, всечестнии отцы наши.

Песнь 7. Ирмос: Божия схождения огнь устыдеся в Вавилоне древле, сего ради отроцы в пещи радованною ногою, яко во свете, ликоваху, поюще: благословен Бог отец наших.
Приидете принесем песни по долгу благоверным великим князем, преподобно пожившим и равноангельно, ихже молитвами воззовем: Боже, спаси всех нас.
Радуися, крестоносныи княже и царьское священие Василие преславне, вторыи Коньстантине, просв.тивыи Рускую землю святым крещением, с праматерию твоею Еленою Спасителю Христу предстояще, в веселии вопиете: благословен еси, Господи Боже во веки.
Красуитася и ликуита, страстотерпца Христова руская князя и самобрата во плоти Романе славныи и Давыде чюдныи, престолу Владычню со ангелы предстояща, поете: благословен еси, Господи Боже отец наших.
Ангеломудреныма хвала великим князем и исповедником тезоименитым Михаилом, з доблим болярином Феодором, и з Георгием, и Василием Ростовским, пение и слава непрестанно, усердно по вере за Христа пострадавшим.
Иже мужеству тезоименитыи — свет в мире, царствию же тезоименитыи, терпением и незлобием якоже Давыд, звезда явися вселеннеи, князь Василии, преименованныи же Варлам.
Небомудреныи князь Констянтин, вторыи Владимир, с чады с Феодором и с Михаилом нын. да почтутся, Гавриил же и Тимофеи с Петром царевичем песньми, яко мудры да похвалятся.
Димитрие — ангел Господень, Феодор — воистинну дар Божии, царьские отрасли, с сими да поются, с Вячеславом, и с Людмилою, и с Ефросиниею, аще кто от благородных другии просия в житии.
Слава: Единаго един — родитель, единороднаго Сына Отец, и един — Единаго Свет и света сияние, и един — единаго Бога Святыи Дух, Господа, Господь един сыи воистину, о Троице, Единице святая, спаси мя, благословяща Тя.
И ныне: Невесто Божия бысть Богородителнице, сего бо Слово превечное телесне родила еси, о нем же и жены святыя, свято поживше, честьми всеразличными Тобою украсившеся, праматернее падение исправиша.
Песнь 8. Ирмос: Иже на горе святеи проявленнаго и в купине огнем Девыя Моисею таину явльшаго Господа поите и превозносите Его во векы.
Пастыря и мудрыя учителя, святителя Христовы Церкве с преподобными вси возвеличим, Господа поюще и превозносяще Его во векы.
По долгу Петр великии, воистинну камень вере и утвержение всея Росии церквам, и с сим доблественыи в подвизех, многострадалныи воистинну и священныи да поется Алексие, со Ионою твердым, иже архиереом всем в Руси начальствующем.
Григория Селунскаго, богословная уста, с Киприяном, и с Фотием, богомудрыма столпома, восхвалим, такоже и Максима Грека, другаго Богослова, с боговещанным и божественым Иосифом.
Гурию слава, Казанскому мироточцу, с двема чюдотворцема отцема, с Варсонофием и Арсением, с ними же и богомудрыи в божественых Стефан с Питиримом и Герасимом с Ионою, божествеными светилники, да поются во веки.
Макария, блаженьству тезоименитаго, святителем славу, со Афанасием Филиппа, и Геронтия, и Даниила, с ними же и Генадия воспоем, животныя светилники, купно со Аркадием и Александром премудрыми.
Никиту священнаго, тезоименита победителя бесом и страстем, и Евфимия, воистинну медоязычнаго, со Ионою пою Моисея, купно с Нифонтом — Иоанна, отцем верховными.
Слава: Яко Единицу существом пою Тя, яко Троицу лицы Тя чту, Отче, Сыне и Душе Пресвятыи, безначалную державу твоего царствия славлю во веки.
И ныне: Ты гора Божия явися, Богородице, в ню же Христос вселися, божественыи храм содела поющая: Господа поите и превозносите Его во веки.
Песнь 9. Ирмос: Проявленаго на горе законодавцу огнем и купиною, рожество Приснодевыя, в наше верных спасение, песньми немолчными величаем.
Во священство священно, святителие и пастырие, облекшеся, и то премудрено окормивше Христу, житием украсиша, учительства слово свыше воистинну приемше, святии обогатистеся.
Леонтия пою, глубину богословия, Исаию же воспеваю, пучину учении, Игнатия же, удобрение, со Ияковом и Феодором доблемудрыми.
Со иже словом просиявшими пастыреначалники и иже крове ради священницы Господни, яко обоюду приемше венца, в песнех и пении да восхваляются.
Кто дерзновение изречет Филиппово, Гермогенову же како премудрость изглаголет, и новгородцких богоносных отец еже по вере твердость.
Феогност божественыи, Спиридон богоносныи, со Иовом патриярхом, Серапион и Василие священноименныи, и Григорие всечестныи, яко Божии светилницы да поются.
Преподобнии отцы и святители Господни, с благоверными князи и женами святыми, именованнии и неименованнии вси, молите спастися душам нашим.
Слава: О, Троице Святая, неразделимая существом, единоцарственая всеми и единоначалная, Отче и Сыне и Святыи Душе, присно рабы своя спасаи.
И ныне: Радуися, полато всех Царя, Еяже ради Царство Небесное отверзеся сущим на земли, Мати Дево, и еже со ангелы вселение.
Светилен: В песнех восхвалим иже постом просиявшая преподобныя, и учителя и таиники божественаго слова, с благоверными князи и женами святыми, и Христа прославим, иже сих возвеличившаго и помощника нам давша во время пощения.
Слава, и ныне: Радуися, Божия полато; радуися, горо присененная; радуися, неопалимая купино; радуися, престоле славы; радуися, божественая трапезо; радуися, ручко всезлатая; радуися, светилниче всесветлыи; радуися, легкии облаче, Дево Мати Марие.